Նյու Դելիում տեղի է ունեցել Հայկական բանակի կազմավորման 34-րդ տարեդարձին նվիրված հանդիսավոր առաջին ընդունելությունը

25 մարտի, 2026

Մարտի 25-ին Նյու Դելիում տեղի է ունեցել Հայկական բանակի կազմավորման 34-րդ տարեդարձին նվիրված հանդիսավոր առաջին ընդունելությունը:

Ներկաներին ուղղված իր խոսքում ՀՀ արտակարգ և լիազոր դեսպան Վահագն Աֆյանը, անդրադառնալով Հնդկաստանի հետ փաստացի ռազմավարական բնույթ կրող գործընկերության խորացմանն ուղղված Հայաստանի արտաքին քաղաքականության առաջնահերթությանը, նշել է, որ երկու երկրների միջև երկարաժամկետ հեռանկարային և շարունակական համագործակցությունն ընթանում է վերելքի հետագծով, այդ թվում՝ պաշտպանության բնագավառում։ ՀՀ դեսպանն ընդգծել է, որ հատկապես վերջին մի քանի տարիներին նկատելիորեն ընդլայնվել է ռազմատեխնիկական, մասնագիտական ռազմական կրթության, ինստիտուցիոնալ երկխոսության և պաշտպանական հաստատությունների փոխանակումների համագործակցությունը։ Անդրադառնալով ոլորտային բարձր մակարդակի հանդիպումներին՝ դեսպանն առանձնանշել է ՀՀ պաշտպանության նախարարի և Հնդկաստանի զինված ուժերի պաշտպանության շտաբի պետի փոխայցելություններն ու այլ ձևաչափերով հաստատված պարբերաբար իրականացվող շփումները։ Միևնույն ժամանակ, ներկայացվել է, որ Հայաստանը շարունակում է իրականացնել պաշտպանական բարեփոխումների համապարփակ ծրագիր, որն ուղղված է սեփական զինված ուժերի արդյունավետության և դիմադրողականության ամրապնդմանը: Ընդգծվել է, որ նշված բարեփոխումները պաշտպանական բնույթի են և իրականացվում են խաղաղության և կայունության հանձնառության ու հավասարակշռված և հավասարակշռման արտաքին քաղաքականության համատեքստում: Նշվել է, որ վերջին տարիներին Հայաստանի կառավարության ձեռնարկած զգալի ներդրումներն ու բարեփոխումներն ուղղված են երկրի անկախության, ինքնիշխանության, տարածքային ամբողջականության, անվտանգության և սահմանների անձեռնմխելիության ապահովմանը: Դեսպանը նաև բարձր է գնահատել մեկ տարուց ավել երկու երկրներում ռեզիդենտ ռազմական կցորդների դերն ու գործունեությունը:

Հնդկաստանի պաշտպանության նախարարության կարողությունների զարգացման գլխավոր տնօրեն, գեներալ-լեյտենանտ Վինիթ Գորը, ով ընդունելությանը ներկա էր գտնվում գլխավոր հյուրի կարգավիճակով, իր խոսքում նշանակալի է համարել երկկողմ ռազմատեխնիկական համագործակցությունն ու կարևորել հետագա խորացմանն ուղղված քայլերի ձեռնարկումը:

Հնդկաստանում ՀՀ ռազմական կցորդ, գնդապետ Արկադի Տոնոյանն իր հերթին անդրադարձել է Հայաստանի զինված ուժերի կազմավորման ընթացքին և իրականացվող բարեփոխումներին։ Որպես վերափոխման հենասյուն՝ ընդգծվել է ռազմական կրթության և մասնագիտական պատրաստվածության զարգացումն ու շարունակական կատարելագործումը, ինչպես նաև պաշտպանական սարքավորումների և կարողությունների արդիականացումն ու դիվերսիֆիկացիան: Գնդապետը նաև հիշատակել է միջազգային մի շարք խաղաղապահ առաքելություններում Հայաստանի շարունակական ներգրավվածության մասին, ինչպես նաև միջազգային պաշտպանական խորացող գործընկերությունների շարքում ընդգծել Հայաստանի և Հնդկաստանի միջև ընդլայնվող պաշտպանական համագործակցությունը։

Ընդունելությանը ներկա են եղել Հնդկաստանի Հանրապետության պաշտպանության նախարարության և զինված ուժերի ներկայացուցիչներ, օտարերկրյա դեսպաններ և ռազմական կցորդներ, դիվանագիտական կորպուսի և հայ համայնքի անդամներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր